ثقب في القلب عمره 18 سنة؟!
جات لي مريضة على مشارف الأربعين بتشتكي من نهجان شديد مع أقل مجهود مصاحب بحدوث زرقان في الوجه و الشفتين و صداع رهيب.
الشكوى دي بدأت عند المريضة من ١٨ سنة بس زادت بشكل مزعج في أخر ٣ سنوات.
المريضة بسبب الشكوى دي كشفت عند كل التخصصات الطبية تقريبا : قلب - باطنة - مخ و أعصاب - صدر - جهاز هضمي - أنف و أذن
كل تخصص بقى يديها تشخيص مختلف و يكتب لها علاج حسب التشخيص اللي استنتجه ؛ و لكن النتيجة ( صفر ) ومفيش أي تحسن يذكر لدرجة إنها بدات تشوف سكة الأعمال و الحسد.
فحصت المريضة و عملت لها رسم قلب ؛ لاقيت رسم القلب مش مريح
بدأت اعملها موجات فوق صوتية على القلب و هنا بقى ظهرت المفاجأة !!
المريضة عندها ثقب كبير بين الأذينين قطره تقريباً ١٧ مليمتر مع وجود اتساع في البطين الأيمن للقلب.
شرحت للمريضة مشكلتها و عرفتها إن الثقب ده عبارة عن عيب خلقي هي مولودة بيه و إنه غالباً هو سبب كل الأعراض اللي بتشعر بيها.
سألتني سؤالين مهمين :-
السؤال الأول : أزاي عندي المشكلة دي من ساعة ما اتولدت و اتجوزت و حملت و خلفت و ما حصليش مضاعفات خطيرة ؟
رديت عليها قلت لها :- أنا اكتشفت المشكلة دي في ستات في الخمسينات من عمرهم و ما كانش عندهم أي فكرة عن المشكلة دي قبل كده.
السؤال التاني : إزاي أنا بقالي سنين بلف عند كل التخصصات بما فيهم القلب و ما حدش خد باله من الثقب ده و خدت كميات أدوية بالهيل من غير أي فايدة.
رديت عليها و قلت لها : 
المهم قلت لها هطلب منك فحص مهم جدا اسمه موجات فوق صوتية على القلب عن طريق المريء عشان نقدر نحدد حجم و شكل الثقب بالظبط و هل في ثقوب أخرى مش واضحة و للا لا و بالتالي نقدر نحدد خطة العلاج هل عن طريق القسطرة و تركيب سدادة للثقب او عن طريق التدخل الجراحي و ترقيع الثقب بواسطة جزء من غشاء التامور المحيط بالقلب.
على قد ما المريضة انصدمت من كلامي على قد ما فرحت من جواها إنها لأول مرة على مدى تاريخ مرضها تلاقي تفسير مقنع و منطقي لشكوتها و تشعر فعلا إنها هتتعالج و تخف فعلاً.
Aisha Aly
احدث المقالات
