لو حضرتك من الناس اللي بيجي لهم نوبات متكررة من الذبذبة الأذينية بدون وجود سبب واضح لها ؛ فالمنشور ده أعتقد مش بس هيكون مفيد ليك ؛ لا ده إنت تقدر تعتبره كنز أو هو الحلقة المفقودة و مفتاح اللغز في حالتك.
بداية كده .. الذبذبة الأذينية أو الرفرفة الأذينية أو الارتجاف الأذيني مرض مالوش أي علاقة بـ ( أذن ????) سعادتك زي ما بعض الناس فاهمة.
الذبذبة الأذينية عبارة عن خلل كهربي في القلب ينشأ نتيجة حدوث تغيرات نسيجية و كهربية في الأذين الأيمن أو الأيسر للقلب أو كلاهما معاً و يترتب عليه تسارع و عدم انتظام في ضربات القلب.
الذبذبة الأذينية لها أسباب كتير مرتبطة بالقلب زي ارتفاع الضغط و قصور الشرايين التاجية و أمراض الصمامات القلبية مثل ضيق و ارتجاع الصمام الميترالي و ضعف عضلة القلب و لها أسباب كتير خارج القلب زي فرط نشاط الغدة الدرقية و قصور وظايف الكلى و السدة التنفسية خلال النوم.
علاج الذبذبة الأذينية في الحالات دي بيعتمد في الأساس على علاج السبب ( إن أمكن علاجه ) مثل إصلاح الشرايين التاجية و الصمامات القلبية و ضبط الضغط و تحسين وظايف الكلى و تهدئة فرط نشاط الغدة الدرقية.
ده بالنسبة لحالات الذبذبة الأذينية اللي لها سبب سواء في القلب أو خارج القلب ؛ و الحالات دي بتمثل الغالبية العظمى من حالات الذبذبة الأذينية بنسبة حوالي ٩٠ ٪؜.
أومال الـ ١٠ ٪؜ المتبقية من حالات الذبذبة الأذينية عبارة عن إيه ؟
هقولك : عفارم عليك .. سؤال وجيه .. و أنا كاتب لك المنشور ده أصلاً عشان الـ ١٠٪؜ دول.
دول بقى يا سيدي عبارة عن مجموعة من المرضى بيجي لهم نوبات من الذبذبة الأذينية بدون أي سبب واضح أو معلوم لا في القلب و لا خارج القلب. يعني ببساطة المريض ما عندوش أي أمراض تسبب له نوبات من الذبذبة الأذينية و مع ذلك كل فترة يدخل في نوبة من الارتجاف الأذيني و يجري على المستشفى و يعلق محاليل منظمة لضربات القلب زي ( كوردارون ) أو يتعمل له صدمة كهربية ترجع ضربات قلبه إلى الحالة الطبيعية و مع كل مرة بيحصل ده المريض بيتعمل له كل الإشاعات و التحاليل و كلها تثبت في الآخر إن المريض سليم تماماً و ما عندوش أي مشكلة صحية قلبية أو غير قلبية تسبب له نوبات متكررة من الارتجاف الأذيني ؛ و المريض يتقال له إنه لازم يعمل عملية كي للبؤر الكهربية الموجودة عند فوهات الأوردة الرئوية الموجودة في الأذين الأيسر للقلب حتى لا تتكرر نوبات الارتجاف الأذيني مرة أخرى.
النوع ده من الذبذبة الأذينية غريب جداً لدرجة إنه أحيانا بيتسمى الارتجاف الأذيني الوحيد أو المجهول (Lone AF).
طيب تفتكر العلم هيقف متكتف قدام الارتجاف الأذيني الوحيد من غير ما يبحث عن سبب منطقي للنوبات دي ؟
أكيد لا
طيب مين اللي بيكون دايماً ورا كل مشكلة مجهولة السبب و يحير المرضى و الدكاترة لانه عامل زي اللهو الخفي أو الطرف التالت اللي بيعمل مشكلة و يختفي و يسيب الناس تقع في بعض ؟
أيوة هو ..
العصب الحائر و الجهاز العصبي اللاإرادي
يييييييييه هو الحائر ده ورانا ورانا ؟ زهقتنا يا دكتور و خليتنا نشك إن كل مرض في الدنيا سببه العصب الحائر.
هقولك : أصبر بس و لما تفهم هتقتنع.
القلب بيتحكم فيه عصبين مهمين جداً عاملين زي البنزين و الفرامل بالنسبة لضربات القلب.
• العصب اللاارادي السيمبثاوي : و ده هو دواسة البنزين اللي بتسرع ضربات القلب.
• العصب اللاارادي الباراسيمبثاوي ( العصب الحائر ):- و ده هو دواسة الفرامل اللي بتبطأ ضربات القلب.
العصبين دول شغالين مع بعض بإتقان بديع و تناسق محكم بحيث ضربات القلب تسرع وقت المجهود الذهني و البدني و تنخفض وقت الراحة و الاسترخاء.
حلو الكلام ؟
قول حلو
المشكلة بتبدأ تحصل لما يحدث خلل في الجهاز العصبي اللاإرادي فيبدأ يحصل خلل كهربي في القلب إما بالتسارع الشديد أو التباطؤ الشديد أو عدم الانتظام زي الذبذبة الأذينية.
الارتجاف الأذيني المصاحب لاضطرابات الجهاز العصبي اللاإرادي له نوعين :-
١- الارتجاف الأذيني المصاحب لفرط نشاط العصب السيمبثاوي و ده بيحصل بعد ما المريض يعمل مجهود بدني أو ذهني أو عصبي.
٢- الارتجاف الأذيني المصاحب لفرط نشاط العصب الباراسيمبثاوي ( الحائر ) و ده بيحصل أثناء أو بعد الأكل مباشرة أو أثناء الراحة و الاسترخاء و أحياناً ممكن يصحي العيان من النوم.
طبعاً المريض اللي بيجي له نوبات من الارتجاف الأذيني بسبب اضطرابات العصب الحائر و الجهاز العصبي اللاإرادي بيحصل له أعراض تانية كتير جداً غير الارتجاف الأذيني قولتها كتير و هقولها تاني عشان اللي أول مرة يتابعنا :- دوخة و عدم اتزان - هبوط - إغماء أو شبه إغماء - صداع ( أغلبه شقيقه أو صداع نصفي) - طنين في الأذن - ضبابية في الرؤية - ألم في عضلات الرقبة و الأكتاف - صعوبة في البلع - بحة في الصوت - شرقة متكررة - غثيان و قيء - حموضة و ارتجاع في المريء. - تجشؤ مستمر - إمساك أو إسهال أو كليهما - إلحاح بولي - أرق - انتفاخ دائم - إجهاد - خمول - ضبابية ذهنية - اكتئاب - عزلة اجتماعية …. الخ و أعراض تانية كتير مع ملاحظة إن مش لازم كل الأعراض تتجمع في مريض واحد.
طيب السؤال دلوقتي …
كيف يتم علاج الارتجاف الأذيني المجهول و اللي كتير من الأبحاث الطبية الحديثة بدأت تثبت إنه مش مجهول و لا حاجة .. ده ناتج عن اضطراب في الجهاز العصبي اللاإرادي؟؟ و هل موضوع كي فوهات الأوردة الرئوية الأربعة في الأذين الأيسر يعتبر علاج جذري و نهائي في الحالات دي ؟
معلش عشان أجاوبك على السؤال المهم ده هاخدك معايا في تفصيله صغيرة بس مهمة جداً.
هو اشمعنى الكي في حالات الارتجاف الأذيني بيتعمل في فوهات الأوردة الرئوية في الأذين الأيسر؟
الإجابة : لإن ده أكتر جزء في الأذينين مليان بالألياف العصبية اللاإرادية السيبمبثاوية و الباراسيمبثاوية و بالتالي مع حدوث أي اضطراب في الجهاز العصبي اللاإرادي بيحصل خلل كهربي في القلب بياخد أشكال مختلفة منها الارتجاف الأذيني و هي دي الفكرة اللي بتعتمد عليها تقنية الكي و هي عزل الأوردة الرئوية كهربياً عن القلب بشكل كامل حتى تقل فرصة حدوث الارتجاف الأذيني.
و لكن ؛ عملياً هل يمكن عزل الأوردة الرئوية كهربيا ً بشكل كامل عن القلب من خلال الكي ؟
الإجابة : عملياً يستحيل عزل الأوردة الرئوية عن القلب بشكل كامل من خلال الكي لان العزل الكامل قد يؤدي إلى حدوث تضيقات خطيرة في فوهات الأوردة الرؤية و بالتالي يحدث احتقان شديد في الرئتين أو أحدهما.
وده معناه إن الارتجاف الأذيني ممكن يتكرر تاني و تالت و عاشر و يصبح الكي بلا جدوى ؛ ده غير كمان إن الألياف العصبية السيمبثاوية و الباراسيمبثاوية منتشرة في أجزاء أخرى من الأذينين و قد تكون سبب في نشوء نوبات من الارتجاف الأذيني حتى مع الكي الاحترافي لفوهات الأوردة الرئوية و لذلك الكي و عزل الأوردة الرئوية مش دايماً علاج جذري و فعال في علاج الارتجاف الأذيني.
أومال ايه العلاج الجذري في الحالات دي ؟
العلاج الجذري هو علاج السبب اللي أدى إلى زيادة النشاط الكهربي في الألياف العصبية المغذية للقلب واللي منها الألياف العصبية اللي عند فوهات الأوردة الرئوية ؛ يعني بمعنى أصح علاج اضطرابات العصب الحائر و الجهاز العصبي اللاإرادي.
و اللي متابعني عارف إني دايماً بقول إن السبب الرئيسي في اضطرابات العصب الحائر و الجهاز العصبي اللاإرادي هو سبب چيني وراثي يترتب عليه حدوث خلل في النواقل العصبية الموجودة داخل هذا الجهاز مثل السيروتونين و الدوبامين و الاسيتيل كولين و النورأدرينالين.
العلاج المتاح حالياً لخلل النواقل العصبية هو علاج دوائي من خلال الأدوية التي تقوم بضبط و تحسين مستويات و وظائف النواقل العصبية المذكورة.
و طبعاً العلاج بالطريقة دي مش هيترتب عليه فقط منع نوبات الارتجاف الأذيني ؛ لا ده كمان هيساهم بدرجة كبيرة جداً في علاج باقي أعراض اضطرابات العصب الحائر و الجهاز العصبي اللاإرادي اللي ذكرتها.
السؤال الجوهري اللي هختم بيه مقالي :
هل هيجي وقت و تبقى الأدوية اللي بتشتغل على مستقبلات السيروتونين و الدوبامين و الاسيتيل كولين و النورأدرينالين من ضمن أدوية علاج الاختلال الكهربي القلبي زي كوردارون و ريتمونورم و ما شابه ؟؟
بعتذر عن الإطالة .. لكن أنا متأكد إن المنشور ده ممكن يغير مفاهيم طبية كتير مش بس عند المرضى ؛ لا كمان داخل المجتمع الطبي.