التشخيص المبكر لاضطرابات العصب الحائر و الجهاز العصبي اللاارادي ينقذ المريض من مضاعفات جسدية و نفسية في منتهى الخطورة
زمان لما كان مريض بيقولي :- أنا بيجي لي دوخة و هبوط و خفقان و ضيق في التنفس و مشاكل في المعدة و القولون .. و لفيت على كل التخصصات الطبية … هل ممكن ده يكون العصب الحائر؟
كان ردي بيكون :- هل بيحصل لك إغماء ؟
كان بيقولي :- لا
كنت بقوله : يبقى غالبا ً لا لان أهم عرض من أعراض العصب الحائر هو نوبات إغماء متكررة .. و ده اللي بيخلينا نشك بقوة في العصب الحائر و نطلب للمريض اختبار المنضدة المائلة عشان نتأكد من التشخيص.
هي دي كانت نظرتي لموضوع العصب الحائر و إزاي أنا كطبيب قلب أشك فيه و أتأكد من وجوده .. و اعتقد ما زالت هي دي النظرة السائدة عن العصب الحائر بين أغلب أطباء القلب لإن ده اللي إحنا درسناه فعلاً.
لحد ما من حوالي ٥ سنين جت اللحظة الفارقة اللي غيرت نظرتي تماما ً عن موضوع العصب الحائر كله.
جت لي مريضة سنها حوالي ٣٥ سنة بتشتكي من الآتي :-
دوخة - هبوط - ضيق تنفس - خفقان - ألم في الصدر - صداع - شد في عضلات الرقبة و الاكتاف - صعوبة في البلع - حموضة و ارتجاع مريء - انتفاخات شديدة - إمساك مزمن - إلحاح بولي متكرر - شحوب في الوجه - ألم في الفك - إجهاد عام - أرق و نوم متقطع - طنين في الأذن - زغللة في العين - تشتت في الذهن - ضبابية في التفكير - فقدان الشغف في كل نواحي الحياة - عزلة اجتماعية و اكتئاب حاد و محاولات متكررة لإيذاء النفس و أفكار سوداوية في التخلص من الحياة.
المريضة الحقيقة كانت منظمة جدا ً و دقيقة جداً في عرض الشكاوي دي رغم كترها و كانت مسجلة في ورقة معاها التسلسل الزمني للأعراض لدرجة خلتني أركز معاها في كل كلمة بتقولها بدون ملل و لا ضجر.
كنت أنا بالنسبة لها طوق النجاة الأخير بعد رحلة معاناة طويلة مع الأطباء في كل فروع الطب لدرجة إنها طلبت مني أول ما قعدت قدامي إني أسمع كل شكاويها حتى لو مالهاش أي علاقة ببعضها و لا حتى لها علاقة بمجالي في طب القلب.
طبعا ً ما يفوتنيش أقولكم إنها بعد ما يأست من طريق الطب بدأت تاخد طريق الدجل و السحر لحد ما وصلت ( ليڤل الوحش) و راحت لأكبر استشاري أعمال سفلية في مصر الڤيزيتا بتاعته مبلغ خرافي مش هقولكم عليه .. و قالها (( عليكي جن عاشق )) 
سيبتها تتكلم لحد ما خلصت كل كلامها وكنت بسجل قدامي على الكومبيوتر كل شكوى هي قالتها بالحرف و بعد كده سألتها :- بيغمى عليكي ؟
قالت لي :- لا
أعدت عليها السؤال تاني :- بيغمى عليكي ؟
قالت لي :- و الله العظيم لا .. عمري ما أغمى عليا .. و أطباء قلب كتير قبل حضرتك سألوني السؤال ده و قلت لهم لا .. ما أغماش عليا و لا مرة .. و عشان كده كل الأطباء اللي روحت لهم قبل كده و منهم أطباء القلب قالوا لي إني مريضة نفسية و روحت لاكتر من طبيب نفسي و اختلفوا في تشخيص حالتي و منهم اللي قاللي إني مش مريضة نفسية أصلاً.
المريضة كملت كلامها و قالت لي:- أنا كنت بسأل الدكاترة اللي بروح لهم و أقولهم :- مش ده ممكن يكون عصب حائر ؟
و الرد عليها من كل دكتور كان بيبقى متفاوت .. ما بين :
• مافيش حاجة اسمها عصب حائر أصلاً
• عصب حائر إيه فال الله و لا فالك
• مش دي أعراض العصب الحائر طالما مفيش إغماء
• معنديش فكرة عن العصب الحائر
قلت لها : عادة إحنا كأطباء قلب بنبدأ نشك في العصب الحائر و ندي له اهتمام و نطلب الاختبار بتاعه (( اختبار المنضدة المائلة)) لما يبدأ المريض يدخل في نوبات إغماء كامل أو جزئي ؛ لكن مش من المعتاد في الحالة بتاعتك إننا نطلب الاختبار لان حضرتك ما أغماش عليكي و لا مرة.
و لكن لأني شاكك بقوة في العصب الحائر ؛ فأنا هطلب من حضرتك اختبار المنضدة المائلة رغم إن المبرر القوي اللي بنطلب عشانه الاختبار ده وهو الإغماء ؛ مش موجود.
المريضة عملت الاختبار و جات لي ..
عايز أقولكم إن رغم إنها عمرها ما أغمى عليها في حياتها إلا إنها فقدت الوعي في المرحلة الأولى من اختبار المنضدة المائلة بدون احتياج لاستخدام أقراص ( دينيترا ٥ مجم تحت اللسان ) و تأكد وجود اضطرابات في العصب الحائر و عندها نوع من أغلس أنواع الاضطرابات اللي هو النوع المختلط اللي هو بيحصل معاه هبوط شديد في الضغط و تباطوء شديد في النبض.
من يومها و أنا نظرتي لاضطرابات العصب الحائر خصوصاً و اضطرابات الجهاز العصبي اللاارادي عموما ً اختلفت تماماً لدرجة إني بدأت اعتبر المريضة دي نموذج و بدأت أوجه لاي مريض جاي يكشف عندي و شاكك إنه عنده اضطرابات في العصب الحائر ؛ أسئلة عن كل عرض من الأعراض اللي المريضة دي حكيتها لي.
المفارقة الغريبة إن جزء كبير جدا ً من المرضى إن ما كانش معظمهم عندهم كل الاعراض دي أو بعضها بس ما كانوش بيقولولها إلا لما أسألهم عنها اعتقادا منهم إن الشكاوي دي مالهاش علاقة بالشكوى الأساسية اللي هما جايين عشانها.
و من بعدها و أنا نسفت فكرة إني ما أشكش في العصب الحائر و لا أطلب اختبار المنضدة المائلة إلا إذا المريض كان بيغمى عليه.
عشرات الحالات اللي بتعاني بقالها سنين طويلة من جميع أعراض اضطرابات العصب الحائر و الجهاز العصبي اللاإرادي ما عدا الإغماء زي إمساك مزمن أو طنين في الأذن أو ألم في الفك أو دوخة أو ألم في الرقبة …..إلخ ؛ و انفقوا عشرات و يمكن مئات الآلاف من الجنيهات و لم يتوصلوا لأي نتيجة ؛ تبين من خلال فحص بسيط جداً إن كل الاعراض دي كان سببها اضطرابات العصب الحائر و الجهاز العصبي اللاإرادي بس ذنبهم الوحيد إنهم مش بيغمى عليهم عشان الأطباء يبدأوا يشكوا في العصب الحائر !!
من اللحظة دي و أنا نظرتي اختلفت تماما لمريض العصب الحائر من مجرد شخص بيدوخ أو يغمى عليه نتيجة انخفاض الضغط أو تباطؤ ضربات القلب ؛ و إن علاجه هو مجرد تعديل نمط الحياة و التزام العادات الغذائية الصحية وممارسة الرياضة والنوم المبكر و استخدام أقراص أو نقط رفع الضغط زي ( ميدودرين كوراسور) ؛ إلى مريض مسكين محطم جسديًا و نفسيا نتيجة وجود عطل جسيم في أغلب وظائف جسمه المرتبطة بالجهاز العصبي اللاارادي؛ و أن المريض ده عنده خلل كبير فى منظومة النواقل العصبية و إن علاجه الوحيد هو إصلاح هذا الخلل العصبي الكيمائي و ليس استخدام نقط رفع الضغط.
الشاهد ..
يجب نسف فكرة أن الشك في العصب الحائر يكون فقط في المرضى اللي بيعانوا من نوبات إغماء كلي أو جزئي متكررة.
هناك عشرات الأعراض اللي تشكك في وجود اضطرابات في العصب الحائر و الجهاز العصبي اللاإرادي و خصوصاً لو الأطباء المتخصصين في فحص الأعضاء المختلفة محل شكوة المريض أكدوا عدم وجود خلل في العضو نفسه أو خلل طفيف لا يفسر كل شكوة المريض.
التشخيص المبكر لاضطرابات العصب الحائر و الجهاز العصبي اللاارادي ينقذ المريض من مضاعفات جسدية و نفسية في منتهى الخطورة و قد ينقذ أسرة من الانهيار بسبب مرض العائل أو تبديد دخل الأسرة بين الأطباء دون أي جدوى .
Aisha Aly
احدث المقالات
